Nyheter fra Regionene

Pressemelding Vinjerock BA

Pressemelding 10-09 - 13. oktober 2009

Vinjerock på hovudjakt
Ynskjer å profesjonalisere leiinga av festivalen

Rockefestivalen på Eidsbugarden hadde i år nesten 4 000 publikummarar kvar festivaldag, og vaks med det ut av dagens rammer. No jaktar festivalstyret etter ny arbeidskraft, som kan sikre at festivalen blir driven like godt også i framtida.

- Vi er ved eit vegskilje, fortel festivalsjef Eirik Høyme Rogn. - Festivalen har no vorte så stor at det ikkje lengre nyttar å basere den berre på dugnadsinnsats, det endar berre med at folk blir heilt oppbrukt.

Festivalen si leiing består i dag av over 20 nøkkelpersonar, og Høyme Rogn legg ikkje skjul på at fleire av desse har hatt i overkant store oppgåver.

- Sjølv om vi veks på erfaringane kvart år, så blir ansvaret vårt dobla med kvar einaste ekstra publikummar som kjem til fjells. Difor tek vi dette grepet no, for å sikre at vi ikkje tynar den flotte dugnadsanden, som alltid vil vera avgjerande for festivalen.

Nevenyttig leiar

Eirik Høyme Rogn er i dag tilsett som festivalsjef i 60% stilling, med hovudansvar for mellom anna program, finansiering og marknadsføring. Den nye stillinga blir like stor, og er øyremerka ein teknisk leiar, som har til hovudoppgåve å sikre ei best mogleg praktisk og teknisk gjennomføring av festivalen og arrangementa rundt.

­- Ved sidan av dette vil vedkommande også få ansvaret for kontroll og vedlikehald av all infrastruktur rundt festivalen. I tillegg kjem fleire leiaroppgåver, for mellom anna gjennomføringa av prosjektet «Vinjeparken», som Sparebankstiftelsen gav oss støtte til i fjor sumar, forklarar Høyme Rogn.

Han understrekar samstundes viktigheita av at dei tilsette i festivalen også har dugnadsanden i blodet.

- Vi skal vera til inspirasjon for over 300 frivillige når alt står på hovudet, så vi må på lik linje med alle andre ta i eit ekstra tak utover det timelista har plass til.

Arbeidet med å få tak i den rette har festivalstyret overlate til Valdres-bedrifta Bufar Råd & Rekruttering, som allereie er godt i gang med å sondere terrenget etter ein nevenyttig rockar.

Fleire behov

Det er også eit par andre ledige postar i organisasjonskartet til Vinjerock framfor neste års festival, etter at nokre har bytta oppgåver, og andre må trappe ned på grunn av studiar. Festivalen treng både transportsjef og vaktsjef, som skal syte for at trafikken og festivallivet går fint føre seg. Dette er dugnadsoppgåver på linje med resten av leiinga, men Høyme Rogn freistar med utbytte av andre slag.

- Vi legg stor vekt på at alle som arbeider frivillig for oss skal få att for det både fagleg og sosialt, og difor har vi blant anna interne seminar, utvekslingsturar til andre festivalar og tilbod om relevante kurs for dei som treng det, forklarar han. - Og ikkje minst blir du del av ein fantastisk stab, som alle er enormt engasjert i jobben med å lage ein best mogleg festival i Jotunheimen, smiler festivalsjefen.

For ytterlegare spørsmål/intervju, kontakt:

Eirik Høyme Rogn, festivalsjef, tlf. 971 09 903, e-post: eirik@vinjerock.no

Stig Jemterud Solberg, Daglig leder i Bufar Råd & Rekruttering AS, tlf. 412 20 910, e-post: stig@bufar.no

Pressebilete frå festivalen: http://vinjerock.no/presse