Nyheter fra Regionene

UFO-en over Valdres var berre lærdøler på fest

Kilde: Valdresen Av: Bjørn Karsrud

Om kvelden den 18. september var det mange valdrisar som såg lyset - nærmare bestemt eit blinkande lys i dei vestre fjellområda mot Hemsedal og Lærdal.

Lyset: Slik ser eit lys frå ein 'Skytracker ut.

Etterpå vart avisa Valdres nedringt av valdrisar som kasta seg på tråden for å fortelja om fenomenet, som dei trudde ein ufo. No viser det seg at mange har gått fem på, medrekna den fyrste innringaren, Tove Sandemo, og astrofysikar Knut Jørgen Røed Ødegaard. Sistnemnde hadde likevel sjølv ikkje sett lyset, og tok når sant skal seiast alle mulege atterhald.
Olaf Sanden på Leira har ei god forklaring på det heile.

Lyset
- Lyset kjem frå ein svær lyskastar som dei bruker på «Villaksen» i Lærdal. Eg var på jakt inne ved Flågrunnshytta, på grensa mot Hallingdal, denne kvelden, og eg såg sjølv lysglimta. Dei kom og gjekk, med systematiske mellomrom. Kåre Buene, som var på Sletterust, hadde sett det same lyset i det same tidsrommet. Og tidlegare har eg sett det på Tønjum.
Avisa Valdres konfronterte Joar Søhoel ved Laksen Pub & Restaurant om fenomenet.
- Er det slik, Søhoel, at de festar så fælt i Lærdal at vi merkar det heilt oppe i Valdres?
- Nei, dette har nok si naturlege forklaring, seier ein lattermild restaurantsjef.

Skytracker
- Vi har nemleg ein såkalla «Skytracker» på restauranten. Det er ein kjempesterk lyskastar som sender ut eit sterkt lys. Eg veit at dei har sett det inne i Årdalsfjella, men aldri høyrt at det har nådd så langt. Men det var spesielle forhold denne kvelden den 18. september då vi hadde skytrackeren på i samband med arrangement på Villaksen. Det var både kaldt og fuktig, og når det er lågt skydekke, så kan lyset slå ned, seier Søhoel.
- Kva synest du om at du har lurt så mange valdrisar?
- Nei, vi bruker berre lyset for å trekkje folk, og kan vi lokke hit folk frå Valdres også, så er det jo berre fint, seier Joar Søhoel.